الجمعة، 9 مايو، 2014

ناس و ناس

 في ناس تقولك لو حابب تكون مشهور وتطلع في النور خليك عكس الناس .. عشان تلفت نظرهم و تعرف تظبطهم وتكون ابن ناس. ساعتها هتلاقي اللي يهتم بيك ويلاغيك حتي لو كنت هلاس.

وناس تقولك اوعي تاخد بكلامهم  .. لوعلوا صوتهم حاول تسكتهم وفي مكانهم سكنهم .. ويا سلام لو تعرف تفهمهم وتغيرلهم وجهة نظرهم.

وناس تحب تتكلم علي طول ومتسمعش .. قطر ماشي مبيقفش .. تقولك خليك بس معايا .. انت في حماية متخافش .. مسيرك في يوم هتوصل متقلقش .. سيبني بس اقودك ومتسألش .. وادى الخريطة عشان متوهش.

وناس تقولك هكلملك فلان وعلان عشان يوصلك فوق للعنان .. وترتاح بقي في حياتك وتوصل علي قفا الغلبان.

وناس تزعقلك وترهبك وتقلبلك وشها .. مجرد بس تطلع غلها .. حتي لو علي عصفورة صغيورة لسه خارجة من عشها.

وناس ولاد ناس تقولك تعالي خد فرصتك .. انا هكون واسطتك .. توهمك انها حبتك لأ وكمان عشقتك ..تفضل سهرانة تكلمك ويا عيني تعشمك  .. عايزة توقعك وفي حبها تغرقك .. مزاجها يا سيدي توجعك .. شبعانة وحابة تجوعك.

وناس تدوس علي قلبك وبعدين تقولك هو انا جيت جنبك .. مش ذنبي اني عجبتك  ده انت اللي وهمت نفسك وافتكرتني خدعتك.

وناس تقولك خليك مبادر وبسيط توصل لقلوب الناس بالعبيط.

وناس تانية جميلة .. لساها اصيلة..  تقولك توكل علي الله .. اكيد طبعا ونعم بالله .. اسعي يا بني واصبر تنول , وذاكر انت بس .. هتوصل علي طول.
 وناس تقول وناس تقول.
وانت شايف وعارف من غير ما حد يقول إن غير رزقك مش هتنول.
لانك لو وصلت هتلاقي ناس كتير بيسمعوك
ولما تتكعبل ومش بعيد تتبهدل هتلاقيهم بيسيبوك
ويتكلموا عليك ويهينوك ومش بعيد يسبوك
بس انت عشان طيب و أهلك عرفوا يربوك
لسه بتحلم بناس حلوة بطيبتهم يزودوك وعارفين قيمتك وفاهمينك وفي بحر حنانهم بيغرقوك وتلاقيهم دايما جنبك حواليك بيضحكوك.
الناس دول موجودين .. جنبك قريبين .. فيهم الخير ماليهم .. شبعانين
دور عليهم هتلاقيهم .. لوغبت شايفينك ادام عنيهم
بيندهوك ويطمنوك بكل شوق وحنين.
#عمرو_هارون

السبت، 3 مايو، 2014

رسالة بلا نص


إلي اول من افكر في صباحي ولا أجد لوم .. إلي من تلازم فكري كل يوم ..
إلي من تحتل الفكر والفؤاد
إلي من تزيل من قلبي العناد
إلي من تحتلني بانفراد
إلي من اشتاق لها بازدياد ..
إلي الامل والاماني  والمراد ..
إلي اجمل لقيا بلا ميعاد 
إلي تاريخي الذي اصبح رماد
إلي من تراها عيني من جميع الابعاد
إلي من تسعي معي لتحقيق الامجاد 
الي من تمحو ما حدث لي من استبداد
إلي اجمل ما يحمله اسم من معان .. وارق ما يوصف من لمعان .. واروع نص بعنوان
إلي ليلي الذي اعتدت سهره .. إلي حبي الذي لن ينتهي عصره
إلي من اخاف عليها اكثر .. ومن انتظرها بجنون ليس اكثر
إلي الحب الجديد 
الي القلب الطيب .. النادر الفريد 
إلي اجمل ما رأت عيني 
إلي شاغلة فكري وذهني 
إلي الضوء الساطع .. الي من اكتب ولا اجد مانع .....

#عمرو_هارون

الجمعة، 2 مايو، 2014

يا للعجب

يا للعجب كوم الدهب  
ما بقاش يساوي عود قصب 
يا للعجب يا للعجب !!
عود الحطب بقي يسوي ملو شوال دهب 
رخص الدهب سوقه انضرب
ونزل معاه بيت الحسب 
وغلي الحطب سعره ضرب 
 بقي في المزاد عرض وطلب 
ايه السبب ؟؟
قالوا السبب ..
الدنيا .. واحوالها عجب ..

( من كلمات والدي مصطفي هارون رحمة الله عليه. )


حالة

والليل لو مر بظروف مثلي لشكى
والدمع الذي اقاومه لو سال لاشتكى
والصخر لو قاسي مثلي لتحرك وبكى
#عمرو_هارون