الأربعاء، 9 سبتمبر، 2015

بابا حبيبي

وحشتني وواحشني كلامك  ..
فاكر لما كنت صغير
وكنت بحب أمشي أدامك
واهرب منك وتفضل عليا تدور
ولما كنت بتسافر الصعيد , وتركب القطر
وتقولي خليك إنت بعيد..
تعالي بس وصلني , وقولي أخبارك في سطر ..
بس ياريت بسرعة ومتطولش !

طيب فاكر لما كنت ببوسك ..
وتقولي خلاص كفاية
روح ذاكر انا عايزك تبقي شاطر
وتركز في دروسك .. 

حاجاتك لسه موجودة .. عبايتك - عصايتك - شنطتك - صورتك - ودولابك ..
لسه حبك جوايا .. عايش مامتش !

فين بقي اللعب و الفوانيس ؟!  و فين الكيس ؟!
بتاع الشيبسي , واللبان  
واللب الأبيض , والسوداني
فين العجلة اللي قلت لي هجيبهالك ؟! 
متقوليش أصلي خايف عليك .. مش هجيبهالك 
طيب وعربيتك  ؟! اللي قلتلي هديهالك ..
عشان تبقي أدام صحابك .. واحد فييس ..
وياريت متقوليش .. خدها مشْي أو اركب اتوبيس..
ده رخيص وهيوصلك في ثواني ..

لسه فاكر آخر سلامي 
وفاكر ابقى اسمع كلامي 
كنت بعاند وبهرب
بس كتير كنت بتعذب 
لما تقولي روح و جرب
بس امشي من أدامي
مسيرك في يوم تقرب
ولما أرجعلك بآلامي  
وأقولك عندك حق  
 إنت صح وأنا لأ 
تاخدني في حضنك وترق 
وتمسحلي كل أحزاني

أقولك على سر..
 أنا كتبت كتير عليك  بس كلامي مبيكملش !!
ألاقي نفسي ببكي ومستحملش
عارفك  هتقولي الرجل مبيعيطش 
هقولك يا حبيبي متقلقش  
محدش شاف دموعي 
بخبيها ومبتظهرش
ولو حد شافها
هقوله عينيا  مبتدمعش  
كل الحكاية إني بس
بقالي يومين تلاتة مبنامش ..!!

                                                    #عمرو_هارون